1. Tag - 11.03.2013

De Abschied isch sehr schwer gfalle, trotzdem hend mirs gschafft und sind ohni Problem in Miami ahcho...

DOCH denn het s Drame erscht ahgfange, es sell jo nöd z eifach sii für zwei blondine allei in Amerika --> Man beachte, alles in englisch!!...

mir hättet inere Nummere müesse ahlüüte zum d Schlüssel übergob vo üsem Apartement z mache, denn hend mir s öffentliche Telefon welle benutze, doch da het üses Geld eifach gschluckt, aber trotzdem nöd welle funktioniere.. also hend mir beschlosse mir möched da Telefon eifach über s Handy... und wies so het selle sii het die Nummere eifach nöd gstumme...

dementsprechend hend mir erneut beschlosse, is Taxi i z stiege und eifach mol zu dere Adresse vo üsem Apartement z fahre und lueged denn vor Ort... viellicht no nebebie z erwähne.. es het NUR schwarzi Taxifahrer gha, und da Taxi isch fasch usenand gheit, Bräms nüme guet und de Fahrer het de Bruef definitiv verfehlt..

guet wiiter.. denn sind mir jo vor üsere Apartement-Alag gstande und hend det e Nummere gfunde wo nöd mit üsere übereingstumme het.. also hend mir denn det ane ahglüte und hend denn müesse erfahre, dassmer neuemed andersch müend go ihchecke.

Do isch zum Glück e flotte junge Maa vo Genf zur Hilf cho und het mit üs de Weg gmacht zum go ihchecke (mir sind gfühlti 10 Stund gloffe - dadurch nomol es riese Dankeschön an d Rahel für d Fuesspfleg :D)..

Bim ihchecke hend mir müesse feststelle, dass de hinter de Theke da nöd würklich im Griff gha het und no weniger informiert gsi isch wie mir.. uf jedefall hend mir noch wiitere gfühlte 10 Stund üsi Zimmernummer sowie Karte, Code etc. becho und sind denn au wieder richtig Apartement gange (damol hemer s Taxi gno und sind nöd gloffe und siehe da.. er war wieder schwarz..... :D)

Bide Apartement-Alag acho: Zugangscode korrekt, Zimmernummer 305: NICHT VORHANDEN!!!    = WELTUNTERGANG!!!!!

de Flott Genfer isch denn aber mit üsere Zimmerkarte bi jedere Tür verbii go luege ob viellicht eifach die notiert Zimmernummer falsch isch.. leider ohni Erfolg.

Also hend mir dem liebe Maa hinter de Theke nomol ahglüte, und er het den gmeint mir seled da mit de Schuel abkläre.. Toll die het jo ersch morn offe.. also wo schlofed d Jessi und d Nadine die Nacht............ (man bemerke: MIR SIND TOTAL UF DE SCHNURRE, GEPÄCK GFÜHLTI 1000 KG)

Denn hend mir doch no e andrei Adresse uf dem Blatt gfunde und hend denkt mir lueged mol no det verbii..

noch gfühlte wiitere 10 Stund sind mir bi dere Adresse ahcho, hend de Ihgangscode welle ihgeh: NICHT KORREKT!!

Zum glück isch doch grad e flotte Berner cho, het üs inelo und gseit es git es Zimmer mit de Nummer 305!!!! Er isch denn au so flott gsi und het üs die Koffere grad vor s Zimmer brocht, und dann die Stunde der Warheit:

D TÜRE ISCH UFGANGE!!!!!!!! und de flotti Berner het denn gmeint mir hebed riese Luxus!! mir sind hingege nur no ahpisst!!! WILL

ESSE UND TRINKE HEND MIR E KEI!!! wenn hättet mir da au no selle go poste?? S Wasser usem Haane chamer jo trinke.. :P

Ob mir nomol müend zügle stoht allerdings no in de Sterne!!

Aber mir sind jetzt duusched und ahcho und gnüüsets jetzt eifach.. :)

Also wie ihr chönd läse, isch jo erscht Tag en volle Erfolg gsi...  :)                 Peeeeeeeease  J&N

2. + 3. Tag - 13.03.2013

1. Schueltag:

Am 08:30 hend mir in de Schuel müesse ahtrette.. noch de Willkommensrundi ischs denn au grad sofort zur Sach gange und mir hend üses "chönne" müesse unter Bewies stelle.

Noch 1 1/2 Stund Prüefig isches denn au scho Mittag gsi und mir hend mit de "Neulinge" und de Schuelleitig dörfe go en American-Burger esse.. Man bemerke; d Schuel het zahlt... :D

Bim Mittagesse hend mir bereits Fründschafte gschlosse und üs für de Obig verabredet.

Eigentlich hend mir gern an Strand welle, aber mir hend nomol ind Schuel zum "David" (verantwortlich für d Unterkünft) müesse, zum abkläre, ob mir s Apartement jetzt no müend wechsle oder ob mir chönd bliibe... Er het denn aber gmeint es sig alles guet und es heb scho sini Richtigkeit und mir müesed nöd zügle.

Also isch d Jessi und d Nadine uf d Suechi nocheme Supermarkt, de hend mir aber in dem "chliine" Miami natürlich nöd grad uf ahhib gfunde.. aber wie ihr üs kenned hend mir nöd ufgeh bis mir denn entlich de Wallgreen gfunde hend..

Da de Ihchauf nöd grad sehr liecht gsi isch, hend mir beschlosse e Velo z Miete und sind mit dem Hei crused... Wenn e Fotograf ume gsi wär, hät da e SUPER Bild geh.. :P            Zwei blondies on tour :D

Dihei ahcho hend mir de Ichauf versorget und entlich üses Hab und Guet chöne ihruume.

Wa für e guets Gfühl  ------->   Entlich ahcho!

DANN DER SCHOCK: Es chlopft an de Türe, d Jessi macht uf und es stoht e Dame det und meint mir müesed zügle!!!

Jessi: (wies in englisch tönt wüssed ihr jo...:P) Kei Chanche, mir hend de David extra gfroged ob mir müesed zügle und er het gmeint NEI.

Guet, die lieb Dame isch denn grad chli schockiert gsi über d Reaktion vode Jessi und het gmeint sie wür da mit em David abkläre.

Mir zwei natürlich voll ahpisst und hend uf e feedback vo ihre gwartet.. leider isch da aber nöd passiert also hend mir nohgfrooged. S Ergebniss: MIR CHÖND BLIIBE UND MÜEND NÖD ZÜGLE!!!  ----> Freude herscht!! :)

Also sind mir sorglos zu üsem Treffe und hend beschlosse, dass mer ez entlich zum Strand gönd und üs en Cocktail göned... Wie ihr eu chönd denke, het au das nid gad sofort welle funktioniere und mer hend üs liecht verloffe... :P Okei auch ein blindes Huhn findet mal ein Korn und siehe da mir hend de Strand entlich gfunde... Denn sind mir chli am Ocean Drive entlang gschlenderet und hend Usschau nochere tolle Bar ghalte... Anere Krüzig ahcho sind mer nüm sicher gsi ih welli Richtig mir sölled und scho isch en Servierboy vomene Restaurant do gstande und het d Nadine am Arm packt und gmeint chömed ine mir hend suuuuuuper Cocktails... Also hend mirr üs überzüge loh und sind ihm noh... Guet, nochdem mir üsi Uswiis zeiged hend hemer e langi Charte ohni Priese becho und hend den alli nebis gfunde, wo üs pässlet... Wo de nett Barman mit de Cocktails cho isch hend mir zimlich blöd us de Wösch glueget, das Teil isch eifach unglaublich GROSS gsi... :)

Mer het chöne meine, de Barman het gfalle ah de Jessi gfunde, da ihren Cocktail seeehr viel Alkohol drin gha het...:P Ufjedefall hend mir ca zwei Stund ah dem Drink umegnuggelet bis mir ihn den entlich besiegt hend...:D Sooo jetzt simer natürlich riif fürs Bett und d Nadine verlangt d Rechnig... D Rechnig ih de Hand luegt sie zu de Jessi und de Julie und seit: "that must be a mistake"... Nach einer kurzen Abklärung dann die Bestätigung:

-----> $95.00!!!!!!!

S Foti vo dem Abzockerdrink gsehnd ihr ih de Fotigalerie...

Da mir jo so netti Schwiizer sind hend mir üses Gspändli hei begleitet, was üs zum Verhängnis worde isch, denn die neue FlipFlops hends nöd so guet mit üs gmeint...:P Nochdem mir d Julie heil hei brocht hend, hend mir beschlosse üsem Figürli und Füess z lieb wieder mol es Velo z miete... Es isch sehr amüsant gsi für d Nadine, do so e komischi Blondine ohni Schueh in Schlangelinie vor ihre her düst isch... :D Ihr verstönd sicher, dass mir noch dem Obet kein Blogihtrag meh hend möge (chöne) tätige... :D

Am nöggste Morge isch es früeh los gange (06:30), will mir hend denkt mir macheds wie d Amis und nehmeds gmüetlich am Morge.. So hend mir zerst in ruhe z mörgelet und sind nocher mit em Kaffi nochli duse ghöcklet... Nochdem mir üs parat gmacht hend isch es den am 08:15 mit em Velo richtig Schuel gange und wie sölls andersch sii, de Wäg isch us unerklärliche Gründ hüt länger gsi...:D

Ih de Schuel ahcho hend mir dörfe erfahre, dass mirs ih die glich Klass gschafft hend ----> JUUHUUUUIII!!! :D

Im Schuelzimmer ahcho hend mir au scho üsen Lehrer kenne glernt und ez e kurzi Beschriebig vo ihm:

- er hockt im Schnidersitz ufem Tisch

- er wacklet mit sim Arsch, wenn er a Tafle schriebt und meint mer chöned chli sin super sexy Arsch betrachte

- er isch überrascht, dass 4 Schwiizer ih sinere Klass sind (man bemerke: 80% sind Schwiizer)

- er isch schockiert über die 6- und 8-jöhrigi Beziehig vo üs

De erst offiziell Schuelmorge isch umegange wie im Flug und isch würkli sehr positiv gsi...:)

Noch de Schuel sind mir chli dur d Strosse gloffe und het geg de Schluss wieder e Supermarkt gsuecht, jedoch en Andere.. :) Wies aber so sell sii, sind mir gloffe und gloffe und mir hend ihn eifach nöd gfunde.. Also hend mir beschlosse mir gönd hei und möched üs für de Strand berat..

Wärend em Berat mache chlopfts a üsere Tür.. und die nett Dame vo geschter stoht wieder do und meint mir sölled doch bitte üsi Sache packe, mir müesed zügle...  ------> FAUST INS GESICHT!!!

Da mir jo zwei ganz braavi sind, hend mir kei Wiederstand gleistet und üsi "7be Sache" packt. Während em Packe isch üs e Zettel ufem Stubetisch (siehe in Fotogalerie) ugfalle...

Mir sind denn mitem Auto zum andere Apartement brocht worde (da wo mir eigentlich vo ahfang ah hättet selle bezieh) und sind positiv überrascht gsi! E riese Apartmenet... Sie hend sogar e zweits Bett ine gstellt damit mir gnueg Platz zum schloofe hend... :)

Mir sind schlussentlich also seeeeehr zfriede mit üsem neue Dihei und werded au stark drum beniided... :)

De Strand hend mir in dem Fall no immer nöd beträtte.... :( Aber mir hends üs fescht vorgno, dass mir da morn schaffed.. :D

Und jetzt ligged mir im Bettli und hend feschtgstellt, dass scho wieder mega spoot isch, darum wünsched mir jetzt e gueti Nacht und ihr läsed wieder vo üs.. :)

Peeeeeeeeeeease J&N

Zwischenbericht... :) - 20.03.2013

Heeeei iiihr... :)

Es isch scho e wiili här sit mir s letscht mol en Ihtrag gmacht händ... aber es isch au sehr schwer zum jede Tag en Ihtrag z mache.. Jedesmol wenn mir aneghockt sind hets wieder a de Tür klopfed und mir sind wieder weg gsi... :)

Es isch immer öbbis los do.. müend üs also entschuldige.. :)

Mir hend üs aber fescht vorgno, dass mir morn im Lauf vom Tag über die vergangene Täg werded brichte.. :) 

Jetzt gönd mir an Beach.. es isch soooo hammer Wätter do und uuuunglaublich warm... s einzig wo nöd so kuul isch, isch dasmer hüt morge in de Schuel erfahre hend dases sehr viel Haie ume het.. zum Glück aber nöd grad an dem Strandabschnitt wo mir sind.. :)

Sooo.. jetzt wünsched mir eu e schöne Obig und ihr ghöred morn vo üs... :)

Jessi und Nadine

Tag 4 bis 10 - 21.03.2013

Tag 4: De Jessi ihren Geburtstag

d Nadine het de Jessi verbote ufzstoh.. da sie zersch no ihres Gschänkli sowie s Gschänkli vode Nadine ihrem Mami het chönne bereit stelle (siehe Fotogallerie).. :) doch denn het sie dörfe ufstoh und het sich seehr drüber gfreut.. :) au sind paar wenigi Trääne gfloose, da halt alli ihri Liebschte (abgseh vode Nadine) de Tag nöd mit ihre hend chönne verbringe..

Trotz dem spezielle Tag hend mir üs uf de Weg ind Schuel gmacht, man Bemerke, mitem VELO :) sus wäred mir z spoot chooo.... und da hend mir jo nöd welle.. schliesslich sind mir pflichtbewussti Schüelerinne... :P

D Schuel isch ganz okei gsi aber nüüd sehr speziells.. so sind mir noch de Schuel am Mittag mit paar Anderne vode Schuel go Mexikanisch esse.. isch würkli meeeeeeeega feein gsi!! D Nadine het sogar kochti Peperoni gässe (mir bitte um Applaus) :D :P

Noch dem feine Esse sind mir zerscht mol go e Monatskarte für s Velo go mache, und wärend desse het s einte Schuelgspäändli bemerkt, dass sich bim Zahle (Mitagesse) zwüsched sine viele 1 Dollar Note e 100 Dollar Note ihgschliche het.. so isches ihm recht unwohl worde und isch sofort zrugg zum Mexikaner.

De Servierboy het denn zu ihm gmeint, er heb no denkt, er sig e sehr e flotte dass er ihm so viel Trinkgeld geb.. :) er het denn aber die 100 Dollar wieder becho het denn aber beschlosse er geb ihm doch no 20 Dollar will er ihm die 100 Dollar ehrlich wieder zrugg geh het (was jo nöd selbstverständlich isch).

So hend mir üs im Cleavlander wiedr troffe und hend eis, zwei mitenand trunke (siehe Fotogallerie).. De lieb Servierboy im Cleavlander het natürlich üsi Päss welle gseh.. luegt de Jessi ihren Pass ah (man Bermerke: HEUTE IST IHR GEBURTSTAG), denoch luegt er de Nadine ihren ah und meint: "Happy Birthday" !!!! Okei.. es isch ahcho.. nur leider bide falsche Person.. aber DANKE... :) Usgeh het er aber trotzdem keis.. :(

Nochem Cleavlander sind mir hei, hend brav üsi Husufgabe gmacht.. nochem mir die erledigt gha hend, sind mir zu üsne liebe Mitbewohner dusse ghocket und hend doch glatt no eis, zwei, drüü viellicht au vier mit ihne drunke... ;-)

Es isch würklich e seehr e kuule und schööne Tag / Obig gsi.. :)

D Nadine het glaub Ihren Job guet gmacht. :)

Tag 5 - nochem Geburri

Kurz und schmerzlos:

D Nohwehe vom Vorobig sind gross gsi und s Ufstoh isch üs au gaaaaaar nöd schwer gfalle... :P

Trotzdem sind mir braaav ind Schuel, da mir jo wie scho erwähnt, sehr Pflichtbewussti Schüelerinne sind.. :) Jedoch, isch an dem Tag nöd viel hange blibe.. und will da d Lehreri bemerkt het und mir glaubed sie het chli die gliiche Problem gha wie mir, het sie beschlosse, dass mir Spieli spieled.. :)

De Obig isch denn au sehr ruhig verloffe, was aber üsi tolle Mitbewohner nöd so recht hend welle zuelo.. dementsprechend hets immer wieder an de Türe Klopft..  :)

Tag 6

Immer no liecht gräderet sind mir us üsem Bett kroche und hend beschlosse mir gönd üsi Nägel go mache lo.. So hend mir s Velo packt und sind durch Miami crused bis mir s passendee Nagelstudio gfunde hend. Soviel Glück wie mir hend, hends au grad für beidi gliichziiitg Ziit gha. Zersch hend mir üsi Fingernägel mache lo und nocher no üsi Füess.. Man Bemerke: Im Massage Stuel.. :) Es isch seeeeeehr ahgnehm gsi... :) S Resultat chönd ihr in de Fotogallerie betrachte. :)

Da mir am halbi 4 no immer nüüd gässe hend, sind mir in Subway und hend döt z Mittag gässe..

Noch dem hend mir versuecht es Taxi für üs ahzhalte, da mir jo üsi zwei Hüener, Joelle und Rousi hend müesse go abhole am Airport.. Leider sind alli Taxi voll gsi wo a üs verbii gfahr sind.. Doch denn.... haltet ÜSEN HELD ah.. er het zwar scho zwei Jungs (vo Peru) debii gha, doch er het gfunde so zwei blondine wie üs chön er nöd eifach am Strosserand stoh lo.. :) So sind mir mit richtig ULTRA Music Festival gfahre (d Jungs hend de Weg zahlt) und nocher ischs wiiter an Airport.. wärend de Fahrt het de Ernesto (Taxifahrer) üs einigi stories vo sim Taxialtag verzellt.. sehr spannend gsi..

Denn sind mir doch glatt in Stau gfahre, aber de lieb Ernesto kennt au anderi Wäg und het denn gmeint, es wür im Stau z tüür werde, da mir do jo d Ziit zahlt.. also sehr e flotte Typ. Au het er üs am Flughafe nöd welle elei loh wege de viele schwarze Taxifahrer.. Er het sie gar nöd gern...

So sind mir in Flughafe inegsecklet hend die beide Hüener abgholt und sind zude Unterkunft vo ihne.

D Jessi und d Nadine sind zum Appartement zrugg gloffe und hend sich bereit gmacht für de Usgang.. Zerst hemer mit üsne Appartmentgspändli chli ih üserem Vorhof d'Party gstartet und sind den wiiter richtig Clevelander...:D es isch den au zimlich früeh am Morge worde, wo mer beschlosse hend, dass es langsam Ziit isch zum üses Bettli ufsueche...:P Leider het üs üsen Orientierigssinn chli im Stich loh und mer sind knappi 2 Stund (normal: 15min) dur Miami girrt...:D Aaaaaber mit Unterstützig vo Ihheimische hemer den üses Neschtli gfunde... :D

Doch leider het s'Drama erst den sin Lauf gno.... Nadine heet ah dem Obet en Gurt vo de Jessica ahgha und het aber gmeint sie hegi de irgendwo verlore, wo sie aber is Zimmer glofe isch lit de gurt aber vorem Bett am Bode mit eme Fläschli wo mer nöd kennt hend... :-O Mer müend hinzuefüege, dass mer sit öpe 2-3 Täg üsi zweiti Zueganscharte vermisst hend... Also simer devo us gange, dass nebert het wölle so nett sii und de Gurt wieder het wölle zruggbringe - nur WER?! Natürlich isch den d'Angst do gsi, dass irgendneber jederziit chan ih üses Appartement ine... :-( Also üsi Schlofzimmertür au nomol abgschlosse und beschlosse, dass mer dringend neui Charte müend hole... Zuesätzlich het d Nadine uf Türfalle e chli Bsteck gleit, damit mir ghöred, wenn nebert wet ine cho!! Zum Glück isch es aber ruhig blibe!!!

Tag 7

Am Morge isch üs nur en chline Kater über de Weg glofe...;-) Doch mir hend leider kei Ziit gha für de Kater und hend üs schnell uf de Weg gmacht zum neui Zuegangschartene z organisiere.. Guet, dass wär au gschafft und was mached mir jetzt no mit dem ahbrochene Tag?? SHOOOOOPPING! :D Was würkli no erwähnenswert isch, do hend d Läde vom Mentig bis und mit Sunntig vom morge bis am Obed offe zum Teil au rund um d Uhr.... really crazy...:D mer verlürt eifach s Ziitgfühl... Im verlauf vom Tag het sich den klärt, wie de Gurt und das misteriöse Fläschli de Weg ih üses Schlofzimmer gfunde het... Churz: Nadine het de Gurt bereits vor de Party abzoge und s Fläschli isch vo de Joelle...:-)

Tag 8

D Schuel het üs weder mol viel z früeh usem Bett gholt - es wird vo Tag zu Tag schwerer zum ufstoh...:-( Viel meh gits nöd z brichte vo dem Tag mir hend en eifach chli am Beach verbrocht...:-)

Tag 9

De grossi Umzug...:-) D Joelle und d Rousi hend ihri 7 Sache ih ihrem Hostelzimmer zeme packt und sind zu üs züglet... Wo mer noch de Schuel haicho sind simer herzlich empfange worde vo dene zwei Mädels...:-) Hüt isch SHOPPING AT SAWGRASS MILLS ahgseit... E "bescheides" Outletcenter...;-) Eigentlich hemer mit üsem Taxifahrer Ernesto abgmacht, doch leider hends die Südamerikaner nid so mit de Pünktlichkeit.............. So hemer beschlosse, dass mer üs eifach es anders organisiered... Wer sucht der findet, leider isch es scho chli es älters Kaliber gsi und mir sind den im Schneggetempo richtig SAWGRASS MILLS...:D Wie und was mir gnau gshoppet hend lömer ez mol us, well sus werded mir nüm fertig, was mir nöd üs sondern de Joelle und de Rousi z verdanke hend...:D Am halbi 9ni hend mirs mol us dem Labyrinth use gschafft und den isch d Frog ufcho - Wie chömed mir hai?? Leider wiit und breit kei Taxi und s Problem, mer chönd kei Taxi us Miami Beach bstelle, well die nöd berechtigt sind zum ih dem Bereich Lüüt ufzlade, do ih dere Gegend anderi Taxifirmene s Vorrecht hend... Aber dene hemer leider keini gseh... Guet so hemer beschlosse mol ah di nöggst grösser Stross z watschle und zum döt üses glück versueche... Leider OHNE ERFOLG.... Hmmm und jetzt??!! Joo sooo viel Möglichkeite hemer nöd gha, also strecked mer mol d Hand use.. Gfühlti 2 Stund und 10'000 verbifahrendi Autos spöter het doch entlich nebert verbarme gha mit üs... Mer hend den dörfe miteme sportliche Mercedes und mit em jamaikanische Bsitzer zimlich zügig retour uf Miami Beach flitze....:D Fotos in der Galerie... Dihai het üs den di lieb Rousi no 4 Kapitel us üsem Englischbuech vorglese und den simer alli 4 toooodmüed is Bettli gheit...

Tag 10

Zwei mit Verpflichtige vo dene vier hend sich ufgrafft und sind in d Schuel.... Aber das isch au nur gange well mer gwüsst hend, dass mir nur 1 Lektion Schuel hend und nocher mit de Klass gönd go e richtigs American breakfast gnüsse... siehe Fotogalerie.... Nochdem hemer üs uf de Wäg an Beach gmacht, wo mer die andere zwei ohni Verpflichtige troffe hend... Sie sind nur liecht ahtrunke gsi und au nur gaaaaaanz bitzeli roooooot.... Noch e paar Stund Beach sind mer hai und hend üs ready gmacht für de Obet...

Zerst simer wie immer chli ih üsem Vorhof mit de restliche Bewohner ghöcklet und es paar hend chli ihri Konatkt spiele loh, damit mir alli zeme chönd inen Club... Mit 18 Lüüt hemer üs den uf de Weg gmacht und bim Club ahcho het sich den usegstellt, dass es doch nöd soooo eifach isch, well mer relativ viel manne debi gha hend... Uf eimol hets gheisse: Ladies first... Mir sind den huschhusch ine (ohni Ihtritt zahle) und hend den festgstellt, dass d Jungs glaub doch nöd ine chömed user sie zahled 70 Dollar pro Person... Do das völlig überrisse gsi isch hemer üs den uf de Wäg zum Usagang begeh, wo dur de Club gführt het... FAZIT: shortest party ever...:D Mir sind den wieder retour ih üses Vorhöfli und het döt en Club eröffnet, sodass den leider churz Polizei verbi glueget het... Sie sind aber sehr fründlich gsi und hend gmeint sie wüssed jo, dass mir nur chli wönd fäschte, aber es segi hald scho chli seeeehr spot und es hallet... Falls sie nomol müesstet cho würs den eifach 1000 Dollar choste, dementsprechend hend mir üs den züglet und d Luutstärki chli gsenkt... Am 03.30 simer den alli ab is Neschtli.... Im Näschtli gläge simer Züüge vome amerikanische Fight im Hinterhof worde und hend festgstellt mir sind würklich in Amerika ahcho...

Soooo ez sind ihr wieder ufem neuste Stand... Ihr werded höchstwohrschindlich erst wieder am Sunntig vo üs läse...

Jessi & Nadine

Tag 11 bis 28 - 07.04.2013

Tag 11

An dem Tag hend mir beschlosse mir möched üses Osterwuchened.. das heisst 4 Tag Weekend.. :) darum hend mir üs denn au ziit gno bzw chönne neh zum entlich wieder mol e Blog Ihtrag z mache.. :)

Nochem Blog Ihtrag hend mir beschlosse chli Fernseh z luege über de Laptop.. entlich wieder mol öbbis dütsches luege... :) Doch leider isch de Nadine das böss zum Verhängnis worde... Man bemerke, mir hend uf de Nadine ihrem Laptop glueged...

Uf eimol goht s Antivirus Programm uf und meint es het en Virus ufem PC... denn het d Nadine schnell uf ENTFERNEN druckt... leider isches aber z spoot gsi und es goht es Bild uf:

THE UNITED STATES

DEPARTEMENT OF JUSTICE

Your IP-adress:  ..............

Your Provider:    ..............

Location:             United States, Miami

YOUR COMPUTER HAS BEEN BLOCKED !

Gründ sind unter anderem: KINDERPORNOGRAPHIE..... 

Selbstverständlich isch de Nadine grad chli schlächt worde... noch öbbe einere Minute hend mir bemerkt dass chli wiiter unde e Fenschter offe isch wos üs filmt.. schnell hend mir us üsem Notfallköfferli es Pfläschterli gholt und d Kamera verkläbt...

Guet.. da Problem wär denn mol glöst gsi... d Nadine het denn gfunde sie würgt de PC mol ab.. will es isch gar nüüd me gange.. neu ufgstartet hets am ahfang guet usgseh, aber denn isch da Fenschter grad wieder uf gange... denn hend mir gfunde mir läsed jetzt da mol dure wo det stoht..

300 Dollar muess inerhalb vo 48 Stund zahlt werde, damit d Nadine wieder Zuegriff uf ihri Datene het, wenn sie die nöd zahlt, denn gits e Strofverfahre... guet.. de Nadine wirds grad no meh schlächt.. schöne Abschluss vom 22. Lebensjohr...

Uf jedefall het denn d Nadine gfunde sie müess jetzt s Mami usem Bett hole (in de Schwiz isch inzwüsche 12fi z Nacht gsi), da sie e Polizischt vo Chicaco kennt.. Mir hend jo welle wüsse, ob d Polizei würklich so vor goht.. In de Zwüscheziit het aber d Jessi mit Ihrem Papi au Kontakt ufgno, und er het denn grad chönne sege, dass da mit höchster Warschienlichkeit e Lösgeldtrojaner isch.

Zum Glück lisst de Jessi ihren Papi 20 Minute, will det isches dinne gstande dass de ume goht.. Mit grosser Hilf vom Loris (Jessi-Papi) hend mir de Trojaner chönne besiege.. OHNI LÖSEGELD Z ZAHLE... :-)

An dere Stell es grosses DANKE an d Sonja (Nadine-Mami) und an Loris!!!

De Trojaner isch jetzt in de Quarantaine... Traue duet d Nadine ihrem Laptop aber gliich nöd.. Verständlicherwiis.... :)

Noch dere ganze Ufregig hend mir üs grichtet und sind dusse mir paar anderne vode Schuel ghöcklet und hend es mega Chäferfescht gha.. :)

Am 12fi isches denn sowiit gsi und d Nadine het GEBURRIIIIII!!!!!! Doch wo isch sie???

----> Da sie jo sone liebi isch, het sie de Kollegin Ihren Sunnebrand versorgt... :)

Mir hend denn nochli mitenand gfiired und ihrgendswenn sind denn au alli müed worde (und natürlich sind alli nüechtern gsi..) und sind go pfuuuse.. :)

GUET NACHT MIAMI

Tag 12

De grossi Tag vo de Nadine fangt nomol frisch ah nocheme churze Schönheitsschlof...;) Jessica het ihre den gseit sie müessi sich ez no gedulde und dörf nonig usem Zimmer usecho... Schnell id Chuchi, Joelle und Rousi gweckt und los mit de Vorbereitige für de Nadine ihri Geburiüberraschig... Backe, backe Muffins, Ballöndli ufblose, Brunch richte und und und... Es isch ufjedefall de Nadine einiges z lang gange, also isch sie go dusche und het gwaaaartet und gwaaaaaartet... Aber e rechti Überraschig brucht hald sini Ziit und nochere gfühlte Stund het sie den dörfe eeeeeentlich usem Zimmer cho..:) Nochem "HAPPY-BITHDAY-SONG" het sie sich den au ihri langersehnti Morgezigii dörfe gönne und den hemers üs schmöcke loh... (s. Bilder)

Noch dem mir den alli gsätigt gsi sind hets den ruckzuck müesse goh, well es isch no en chlinere Shoppingmarathon ahgseit gsi - schliesslich brucht jo s Geburichind no es perfekts Outfit für de Obet und die extern Festplatte muess jo au no ane... Guet, unverhofft sind mer den au uuuuunglaublich schnell gsi, what a surprise...;-) aber wie mer Fraue nöd anderst kennt, isch es am Schluss den glich uuuh mega knapp worde...hihi.. Schnell husch husch hai, well Usgangsfertig müemer jo au no werde.. De speziell Obet hemer den gebührend bis spot in Morge im Club Mokai gfiiret...

Tag 13-28

Bitte händ erbarme mit üs.. es sind jetzt einigi Täg, wo mir nüm gschriebe hend.. dementsprechend fassed mir jetzt eifachli chli zäme, was mir bis hüt alles so erlebt hend.. :)

Sunne, Beach, Party und Schuel.. das wärs... :P

Zwüschedure isch aber doch au öbbe öbis passiert.. wie sells au andersch sii.. :)

Eines Abends hets üs wieder richtig Mokai zoge.. das heisst ei Kollegin vo Belgie het ihren letscht Obig nomol so richtig welle gnüüse.. so simer e grösseri Gruppe gsi und hend vorem Club gwartet zum ine cho.. Die einte sind schomol ine und denn chunt doch de Promoter und meint, de Kevin - en Kolleg vode EC Schuel.. - chem nöd ine will er z bsoffe sig.. durch da dass da nöd de Wohrheit entsproche het, sind mir verständlicherwiis mega sauer worde.. alli hätte ine dörfe usser er..

Also hend paar vo üs beschlosse, mir kehret dem Club de Rugge zue und möched e "Drexel-Party", das isch bi üsne Appartements vorne usse.. :)

Eines Nachmittages womer vode Schuel hei cho sind, hend mir üsi Schuelsache dihei abglade und sind nochli go pöstele.. Nocheme pöstele hend mir gfunde mir höcklet dihei nochli hi und lueged denn was mir wend mache.. ABER DENN SIND MIR NÜM INE CHO WILL ÜSI KARTE NÖD GANGE ISCH!!! Mir sind fasch verzwieflet.. Leider isch üs nüüd anders übrig blibe wie zum Chelsea Hotel z go zum e neui Karte go hole..

Verständlicherwies sind mir recht kaputt gsi vom viele shoppe.. so hend mir beschlosse mitem Taxi z go.. de erscht Taxifahrer het üs aber leider nöd welle mitneh, wiler gfunde het da sig jo nöd so wiit weg (es sind 6 Blocks zum laufe), also het d Nadine beschlosse sie seit im Taxifahrer er sell doch eifach wiiterfahre, wener kei Geld will verdiene.. und z mol het er denn welle.. Mir hend denn aber uf ihn verzichtet und s nexte Taxi gno.. :)

Det ahcho heissts, sie hebed de Scanner für d Karte nöd do, mir müessed ind Penselvenia Ave go.. (das isch det wo mir die erschte Nächt verbrocht hend).. sauer sind mir denn det ane und hend denn entlich üsi zwei neue Karte becho..

Eines anderen Nachmittags noch de Schuel, hend mir bechlosse mir verewige üsi Reis für immer...

Mir hend jo scho in de Schwiz beschlosse, mir wend üs e Tattoo steche lo, wo üs immer an die Reis wird erinnere (nebst dem wo im Kopf und uf de Bilder existiert).. S Motiv isch lang nöd bekannt gsi.. Zumindescht nöd definitiv..

Denn sind mir eimol mit de Joelle im Restaurant ghocket, und bim Kaffi trinke hend mir e Serviette entdeckt und mol ahgfange mölele.. ziemlich schnell hend mir denn da gfunde wo üs uf ein Schlag passt het..

So hend mir im Internet echli recherchiert und denn au bald s passende Tattoo-Studio gfunde. Glücklicherwies hend sie grad ziit gha für üs.. :)

Jessi isch tapfer gsi und hebt als erschts ane.. :)

Ihres erschte Tattoo.. richitig, richtig nervös het sie sich uf de Stuel gleit.. d Nadine het ihri Hand müesse hebe.. :) noch einere Stund isch d Jessi fertig gsi und de Nadine ihri Hand au.. :D

Es isch richtig schön worde..

Denn isch d Nadine dra.. wend Ihr würklich wüsse wie lang dases bi ihre gange isch???? :)

6 MINUTE... :D

Wohl isch de Jessi ihren Tätowierer nöd ganz so erfahre gsi wie de Nadine ihren..

Aber wichtig isch nöd d längi, sondern dases schön usecho isch und mir würkich stolz uf das Tattoo sind.. :)

Guet, do jo Shopping in America nöd gad unbeliebt isch hets üs eimol meh ine Shopping Center zoge... Ih de Dolphin Mall ahcho hend mir üs no gschwind en feeeeeine Salot gönt und sind den gschwind los, well schliesslich hemer jo no einiges vor üs gha..  Aber wies hald au sus isch findet mer  

jo den sicher nöd das wo mer suecht und drum isch üsen Ihchauf den au seeeehr spärlich usgfalle.. :( Jänu, halb so schlimm, mer hend jo schliesslich no paar Mönet vor üs und somit isch es jo nur halb so schlimm... Munter dihai ahcho hemer den nochli welle mit allne "Shoppingqueens" dusse höckle.. Bim useruume het d Nadine den festgstellt, dass mer ih de Chuchi en chline See hend... OOOOOH SHIT! Woher chunt das Wasser, bitteschön??!!!! Schnell sind mer fündig worde, es hät doch tatsächlich durch s Dach inegregnet (Jo, in Miami regnets abundzue au, aber wenn den ih ströme..;) ) Okei schnell de Emergency-Number ahglüte und nocher isch warte ahgseit gsi... Zur Erklärig, es het do seeeehr viel Südamerikaner, wo hald eifach au es ganz anders Ziitgfühl hend... Noch 3-4 Stund isch den mol no eine ihtrudlet und het üs mitteilt, dass er leider jetzt nünt chön underneh, well das zerst alles muess tröchne, aber sie chömed am nöggste Nomittag das go flicke... Noch 3 mol reklamiere sinds den 3 Täg spöter endlich mol cho... Zum Glück, well genau ah dem Obet hets wie us Chüble gregnet...

Was mer aber in Miami au nöd dörf verpasse isch e BOOTSTOUR... Mir sind üs schnell einig gsi, dass mer das alli gern möchtet erlebe und so sind mer den zerst zu 8 gstartet (nur Fraue) und hend den underwegs no s 9 Gspändli (ein Maa) ufglade und er isch dementsprechend am Hafe de Hero gsi... :D Es isch eifach es unbeschrieblichs Gfühl gsi das dörfe z erlebe... (siehe Bilder) :)

Scho sit mir ih üsere Apartementahlag ahcho sind hend mir müesse feststelle, dass mir jede Tag minimum 10 neui Muckestich hend... :( Bi diverse Gspröch mit Lehrer, Beachbekanntschafte und Nochbure hend mir müesse feststelle, dass die Stich nöd vo Muckene sondern vo Bettwanze sind.. Sofort hemer das ih de Schuel gmolde und ih üsere Apartmentahlag isch s Bettwanze-Fieber usbroche... Diversi Nochbure hend nemli di gliche Problem wie mir und so hemer den chli meh Druck chöne usüebe..

Am Donnstig, 05.04.2013 isch en chline Usflug ufem plan gstande: 2 Täg Orlando... Juppiiiiiii Bahnefahre... Miteme gediegene SUV sind mir denn richtig Orlando düüst.. :) unterwegs sind mir ine starks Unwetter mit Gwitter, starkem Rege und Wind cho.. mir hends aber überlebt und sind schlussendlich guet im Royal Plaza Hotel ahcho.. :) s Zimmer isch jetzt nöd würkliich sehr luxuriös gsi, aber es het glanged für üs 5.. :) natürlich hend mir 3 (Jessi, Liisa und Nadine) wiiblis  (mir sind 4 Fraue und ein Maa gsi) nöd grad welle go schloofe und hend denn beschlosse mir möched jetzt s Hotel nochli unsicher.. :) wiit sind mir nöd cho, scho het üs e Disney-Shop ahzoge und denn hend mir doch glatt e Mini-Maus Kappe kauft.. Nei, mir sind würklich nöd ufgfalle.. :P

Noch üsem super Ihkauf hend mir no an de Bar eis welle go neh.. aber leider sind mir 1 Minute z spoot gsi und es het nüd me geh.. aber da isch nöd schlimm gsi, da mir zum Glück selber chli öbbis mitgno hend.. :) Es isch denn relativ spoot/früeh worde bis mir is bett sind... am Morge liecht ahgschlage hend mir üs aber gliich ufgrafft und sind richtig Universal Studios gange.

Es het zwei Wahnsinnig schöni Parks gha, s Universal Studio hend mir am Friitig bsuecht und s Universal Island of adventure am Samstig.. isch würklich uh guet gmacht döt und es het üs voll pässlet.. Abr üsne Füess nöd..leider..

Am Samstig hend mir üs öbbe am 9ni uf de Weg hei gmacht.. unterwegs hend mir en Hellikopter mit Schiinwerfer gseh umeflüüge und wiiter vorrne ganz viel Polizei Auto..

Die Nett Dame vode Zahligsstell het üs ufklärt, dass mir üsi Fenschter sölled zue mache und d Türe verrigle, da eine mitere Waffe irgendswo unterwegs isch und d Polizei de suechi.. NA TOLL... mir hend üs au gar nöd fasch ins Hösli gmacht..

Aber hei, wie ihr gsend hend mirs überlebt.. sus chönted Ihr jetzt de Blog Ihtrag nöd läse.. :)

Guet dihei ahcho, hend mir natürlich nöd sofort welle go schloofe, obwohl mir totmüed gsi sind.. :) Mir sind: Liisa, Jessi und Nadine

Also hend mir no eis zwei mitenand drunke bis üsen "Lieblingsnochbur" cho isch und denn sind mir schnell is Zimmer.. ;)

Hüt morge ufgstande hend mir üs ufe Weg gmacht zum s Auto zrugg bringe und nocher simer go pöstele.. :)

Und juhuu d Nadine het jetzt ändlich e Ami Handy sowie Nummere.. :)

Jetzt sind mir ganz gmüetlich im Drexel dusse am höckle und gnüssed no ein vode letschte Obig mit üsem neugwunnene Schätzli Liisa... :)

Wenn dases ab is Bett goht, stoht no in de Sterne.. Mir hend nemmlich hüt erfahre, dass mir morn kei Schuel hend, sondern eifach mit de Klass gönd go z morge esse.. :) Und anscheinend het üsi Lehrerin ins Sexmuseum welle.. aber wies schiint hend das die andere vode Klass nöd welle.. :)

So, mir hoffed das mir jetzt nüm so lang bruuched bis de next Blogihtrag chunnt.. :)

Peeeeaaaaaace

J&N

Ah öbbis hend mir no z brichte.. falls da nöd scho passiert isch.. ;):

Unter üs wohned 4 Models... vo eim devo findet Ihr es Foti in de Fotogalerie.. :)

Tag 29 bis 35 - 14.04.2013

Wie im letschte Blog-Ihtrag am endi erwähnt sind mir am Mentig, 08.04.2013 mit üsere Klass go z mörgele.. nei es isch nöd s erschte mol.. we know.. :) aber da mir jo jedi Wuche neui Mitschüelerinne und Mitschüeler bechömed, isches gliich wieder öbbis anders gsi.. :) au isches nöd s gliiche Diner wie letscht mol.. :) Nur schaad isch, dass nöd alli vode Klass mitcho sind, aber wichtig isch jo, dasmer e uuh tolle und sehr amüsante Morge gha hend.. :)

Ahgfange hets mitem Weg zum Diner..

Zersch hend mir mol e Ewigkeit uf de Bus müesse warte.. und da de sehr viel verspötig gha het, het d Busfahrerin dementsprechend gaas geh... Mir müend bemerke.. d Strosse do sind nöd z vergliiche mit dene bi üs in de Schwitz.. Mir hend üs gfühlt wie z Orlando ufere Achterbahn.. Isch würklich e seeeehr e ruckligi Ahglegeheit gsi.... Das het au e anderi Passagierin (e schmaali jungi Dame) gfunde und isch zude Busfahrerin (e recht robuschti dunkli Frau), und meint sie sell doch bitte chli längsemer fahre usw... Doch irgendswie hend sich die beide sich nöd so würklich gern gha und das hend mir denn au z ghöre becho.. die jung Dame het denn d Busfahrerin ufbotte zum usstiege und fighte.. d Busfahrerin het denn aber dankend abglehnt und isch wiiter gfahre.. Denn entlich isch d Haltestell cho wo die jung Dame het müesse usstiege.. Aber natürlich het sie da nöd still chöne mache und isch zude Busfahrerin ane und het nochem Name gfroged.. sie het ihn denn aber nöd welle nenne, also hets e Foti geh und e erneuti ufforderig zum go fighte.. ah und so nebebie het die Dame au no erwähnt dass sie schwanger sig... Schwanger und fighte.. mhm das passt.. :) D Fahrerin het denn aber wieder dankend abglehnt..

De eint Schuelkolleg hätt zwar gern gseh wie sich zwei Fraue prüglet.. aber schlussentlich sind mir froh gsi isch ein vo beidne vernünftig bliibe, ansonschte wäred mir jo nie ans Ziel cho.. :)

Sooo entlich im Diner ahcho, hend mir denn au e feins amerikanischs z Morge chönne gnüüse... Aber es isch leider nöd ganz so fein gsi wie bim erschte mol.. :(

Nochem esse sind mir an Ocean Drive und sind richtig Mangos (das isch e Club), denn hend mir det ine dörfe obwohl no gschlosse gsi isch und hend üs chönne drüber schlau mache, wie dass de Club entstande isch... Aber bitte froged üs nöd wie... mir wüsseds nemmli nümme... :P

Guet, gnueg vom Mangos und mir sind wiiter ins Clevelander (ihr erinneret eu viellicht no.. da isch die Bar wo mir noher öbbe 2 Stund hei gha hend.. :P )

Also hend mir denn dört au alli scho üsen erschte Drink gno... Jo au üsi Lehrerin, d Kathy.. Sie het denn det de Barkeeper FRANK kenne glernt und isch völlig hiigrisse gsi vo ihm.. :) Er isch aber glaub au nöd ganz abgneigt gsi (siehe Bildergalerie). So het sie e Shot vo ihm spendiert becho.. und mir sind leer usgange... Jänu... mir hend üs ür sie gfreut.. :D

Was mir am Nomi gmacht hend, wüssed mir jetzt au nüm so gnau.. ABER mir sind sicher hei, da üses schätzeli Liisa uf üs gwartet het (sie het für üs gwäsche.. huere flott.. a dere Stell nomol danke Alti :D )... mmmh... so viel mir no wüssed hend mir üs eifach e schööne Tag im Drexel gmacht unds eifach no gnosse bevor d Liisa ind Bahamas gange isch..

Am Ziischtig in de Schuel hend mir vode Kollegin erfahre, dass sie grad ebe Gotti worde isch.. Da dörf me jo natürlich nöd ungfiired loo.. :) Bevor da aber cha gfiired werde bruuched d Jessi und d Nadine wieder neui Nägeli.. :)

Nochdem sind mir denn los und hend e alkoholfreie Sekt welle poste, will s früschbackene Gotti trinkt kei Alkohol.. Aber leider isch das in Amerika wohl nöd so eifach.. mir hend ein Lade nochem andere abklapperet aber leider ohni Erfolg...

So sind mir halt ohni alkoholfreie Sekt zu Ihne uf Bsuech gange und hend eifach so e sehr e gmüetliche obig mit Kolleginne und em Kolleg gnosse, mmmmh.... mir hend denn für üs gliich nochli z trinke mitgno.. aber da jo alkoholfrei do nöd so gänig isch hend mir üs wohl oder übel für de Alkohol müesse entscheide... :P

Irgendswenn hend mir gfunde mir schländeret mol richtig Hei.. Dihei ahcho hend mir zwei üs nochli dusse anegsetzt und hend no e chliises Chäferfescht gha, doch lang sind mir nöd elei gsi... e seeeehr unerwünschte Gascht het sich ahgschliche:

COCKROACH = KAKERLAKE

Jo es Foti vo üsem "neue Lieblingstier" gsend ihr in de Galerie... aber ganz komsch isch jo, in live isch sie ufem Rugge wiess gsi.. ufem Foti aber schwarz... jänu.. z mol hend mir sie uf jedefall us de Auge verlohre.. und wie mir halt so sind hend mir üs fasch is Hösli gmacht und hend beschlosse üses Chäferfäscht lieber zu zweit (hoffentlich) im Apartement wiiter z füehre... Aber denn de next Schreck:

COCKROACH, warschienlich in de andere ihres Kind, Maa, Frau oder was au immer.... :P

Aber zum Glück an de Türe vode Nochbuure.. :) Also schnell ine und abschlüüsse.. :)

Ah au no en andere chliine Grund werum mir ine sind.. Vor üsere Apartementahlag hend e Gruppe Manne e rechti Usenandersetzig gha.. und mir hend kei Züüge welle werde.. :)

Mittwuch... was isch am Mittwuch gsi?!

Noch de Schuel hend mir entschiede mir geched hei nochli go pfüüsele, da mir d Nacht vorher ebe doch nöd soooo viel Schlof becho hend.. ;) D Milena (e Klassegspöndli) het sich üs ahgschlosse und sich bi üs ufs Sofa gleit.. jo.. useme kurze Mittagsschlöfli isch denn doch chli e längers worde... mir sind schlussentlich am halb 6si ufgstande... defür hend mir noher nochli power gha zum chli party mache.. :)

Am Dunnschtig, sind mir au wieder braav ind Schuel am Morge.. da wüssed mir so genau will es isch usserordentlich chalt gsi im Schuelzimmer... mir sind würklich fasch verfrohre.. selbst üsi Lehrerin d Kathy het gfroore und mir denked das muess was heisse.. :)

Jänu mir hend nüüd chönne degege mache, aber wenigstens hets üs wach phalte.. het also sini Vor- und Nochteil.. :)

De Rescht vom Tag hend mir denn gaaaaaaanz gmüetlich verbrocht.. :)

Am Friitig hend mir eigentlich würklich ind Schuel welle, aber d Nadine het lang nöd chönne schloofe und het e seehr unruhigi Nacht gha, sodass sie fasch nöd ufmöge het wo de Wecker glüte het.. und das isch de Jessi grad au recht cho... :) denn hend mir üs welle umchere und wiiter schloofe.. aber üses liebe Model (de Brad) wo unter üs wohnt, het e riese Party gha mit luutem Geschnorr und Musik, so das mir nöd hend chönne schloofe, also het d Nadine beschlosse sie goht eino go rauche und d Jessi het sie begleitet damit sie nöd so elei dusse hockt.. schnell isch denn au de Brad do gstande und het sich mit üs usgiebig avo unterhalte.. es isch sehr amüsant gsi.. :) Er het denn schnell z gspüüre becho dasmer wege ihm nüm chönd schloofe, aber das isch jo au kei Problem gsi... trotzdem ischer s fründlich gsi und het d Musik abgstellt.. aber schloofe hend mir denn gliich nüm chönne...

Am Nomi isch denn d Milena zu üs cho und mir hend e ganz e gmüetliche nomi zu dritt gha und sind denn zobig mit no wiiter zwei Mädels on tour gange.. leider isch denn da aber nöd lang gange da d Milena nonig 21. isch und in kein Club ine cho isch.. so hend mir üsi Party im Drexel wiitergfüehrt bis früeh ind Morgestunde.. :)

Am Samschtig sind mir dementsprechend kaputt gsi.. aber da het üs nöd devo abghalte e gmüetlichs z Morge am Nomi am 2 mit paarne vode Schuel z mache.. :)

Da üses Apartement so langsam mol wieder putzt sett werde, hend mir d Putzkippe gfrooged, obs hüt wieder mol chömed cho putze.. Wie immer hend mir müesse frooge.. vo elei chömeds jo leider nöd.. Sie hend denn aber gmeint: Maniana.. Okei.. isch akzeptiert...

Hüt chunnt d Liisa au entlich wieder zrugg vode Bahamas... :)

Z mol bemerked mir, dases recht schwarz isch am Himmel bitz wiiter weg vo üs.. und es isch au seeeeeeehr seeeeeehr düpig gsi.. uf eimol chunnt da cho blitze, donnere und regne.. s Ergebniss vo dem Wetter gsend ihr in de Galerie... = HOCHWASSER IN MIAMI BEACH!!! unglaublich aber wohr!!!

Uf de Stross überall hets Wasser gha.. de Nochbur isch mit sim tüüfergleite Auto gar nöd wiit cho.. :)

So schnell wies cho isch, isch denn da Wasser aber au wider verdunschtet.. :) Isch mol no schöön und kuul gsi das dörfe z erlebe.. :)

Mir hend d Liisa welle verarsche, in dem mir üs dusse verstecked und sie vor verschlossner Türe stoht.. Aber leider het das wohl nöd so welle sii... Da mir langsam schlau sind und d Karte immer vorher teste, bevor mir d Türe schlüssed, hend mir gmerkt dass beidi üsi Karte nüm funktioniered.. und denn sind mir würklich so richtig sauer worde.. Es isch jo nöd s erschte mol.. Also het d Nadine im Chelsea Hotel ahglüte und drum bätte dass öbber üs e Karte sell verbii bringe wo funktioniert.. Aber die "lieb" Dame am Telefon het gmeint mir müessed verbii go.. d Nadine het da nöd eifach so welle akzeptiere.. Will es sind doch 6 Blocks entfernt.. Denn het die Dame gmeint sie chön sich nöd meh wie entschuldige und mir seled am nexte Morge am Manager ahlüüte und henkt eifach s Telefon uf.. Uiiiii... da isch gar nöd guet ahcho bi de Nadine..

So isch üs denn au nüüd anders übrig blibe, wie uf d Liisa warte (ohni sie z verarsche) und noher neui Karte go hole go... Da d Jessi mega fescht Buchweh gha het, isch d Nadine mit de Liisa und Milena los gange..

Die Dame am Empfang het natürlich grad gwüsst um weli Apartement Nummere dases goht und het drü Karte geh und gmeint sie hoffi eini vo dene wür immer funktioniere..

Zrugg bide Jessi isches ihre denn au scho wieder bitzeli besser gange und üsi Party het chönne wiiter go, au sind immer meh lüüt dezuegstosse.... das isch e gaaaaaanz e langi Nacht gsi... Aber au uuuuuunvergesslich.. so einiges hend mir erlebt, wie z.B hend mir miteme Cabriolet chönne mitfahre :)

Es isch eifach e mega tolle letschte Obig mit de Liisa gsi..

Hüt am Sunntig, hend mir eigentlich ufe Mittag and Gayparade welle.. aber leider sind mir zu kaputt gsi vo geschter obig und es isch au eifach viel z heiss gsi hüt, sowohl dusse wie dinne, dass mir üs nöd vom Fleck hend möge bewege...

Putzkippe isch am Zimmer putze.. mir erinneret üs a geschter, do hends jo gmeint sie welled hüt bi üs putze... also frogt d Nadine nomol lieb no, ob sie jezt hüt putze düend.. D Antwort: Nei, üses Zimmer sig hüt nöd dra.. jo denn isch d Nadine denn au chli sauer worde, da sie jo geschter gseit hend sie welled hüt cho.. dementsprechend hend sie denn gmeint sie welled am 2 cho putze..

Guet, am halb 5fi sinds immer no nöd bi üs gsi.. und wiit und breit kei Putzkippe z gseh..

Jaja.. die hend halt nöd die gliich Ihstellig zum schaffe wie mir... :)

Ein schwere Weg isch no vor üs glege... Mir hend de Liisa müesse tschüss sege... Da isch üs sehr schwer gfalle, will mir hend sie würklich ganz tüüüf in üsi Herze gschlosse und hend e unvergessichi Ziit mit ihre dörfe verbringe...

Goodbye Liisa, it was a amazing time with you!!! Unforgettable!!! We will miss you sooo much!!!

So und jetzt isch au scho wieder 12:38 am, aber mir gönd jo morn wieder go zmörgele mit de Kathy und de Klass und nochem z Morge gönd mir an South point.. isch also nöd so schlimm wenn mir nöd so viel schloof hend.. ;)

Mir gnüüsed die Ziit do abartig.. es isch würklich hammermässig do und es fallt üs sehr schwer, dasmer inere Wuche d Schuel fertig hend und meh oder weniger scho müend Tschüss sege in Miami...

Aber üsi Reis isch no lang nöd z end... es goht jo nocher wiiter.. und uf das freued mir üs au mega!! Übrigens hend mir zwei üs blendend gschlage und no kei einzigs mol müesse striite...:D Mir sind ebe super!!

So... Ihr ghöred wieder vo üs.. :)

Möcheds guet!!

Grüesssliiiiiii

J & N

Zwischenbericht - 25.04.2013

Sooooooo, mir lebed no....:-) üsen Roadtrip isch scho in vollem gange und mer meisteret das bis jetzt ganz guet... :-) Auto fahre klappet, Unterkunft sueche klappet und und und... Aber leider fehlts üs chli ah de Ziit für üsen liebe Blog...:-( Mer hend üs aber s Ziel gsetzt, dass mer üses Update ih de nöggste 7 Täg online stelled, well mer hend seeeeehr viel Bilder und die müend mer alli zerst komprimiere, dass mer die chönd ufelade... :-P Sind üs bitte nid böss..

Viellicht churz e Zemmefassig wo mer ih de nöggste Täg sind: Memphis, Nashville und den Sevierville. In Sevierville möchted mer den mol paar Nächt blibe, chli chille und shoppe, aber au üsi wenige Verpflichtige wie Blog schriebe, Skype, etc. erfülle...

Also ihr liebe, freued eu scho jetzt uf es lustigs Update...

Peeeace

J&N

Tag 36 bis 42/43, die letscht Wuche MIAMI.. :( - 29.04.2013

Soo... die letscht Wuche in Miami isch ahbroche... :(

Am Mentig, hend mir eigentlich denkt mir möched e ganz e gmüetliche Tag am Beach und lönd d Schuel USNAHMSWIES mol sause.. :P

Doch üsi lieb Lehrerin het üs e Strich durch d Rechnig gmacht, in dem sie no es letschts z Morgeesse mit üs plaant het.. so hend mir üs denn natürlich au beschlosse dra teilzneh.. :)

Also sind mir wie jo no nie ins Primetime go z mörgele und hend nocher eigentlich mit de Klass an South Point welle, aber do het üs das liebe Wätter e Strich durch d Rechnig gmacht... Also het d Jessi und d Nadine de Lehrerin de Vorschlag gmacht, mir chönted jo ins Clevelander go wo grad ume Egg isch zum ihres neugwunnene Schätzli de Frank go bsueche (mir hend schomol vo ihm brichtet.. =))

Sie isch denn natürlich au ganz schnell uf de Vorschlag ihgange und schwupps sind mir mol wieder im Clevelander am morge am 11fi ghocket.. :)

Und wie mir so sind, hend mir natürlich nur Orangesaft bstellt.. :P

Mir hoffed jetzt mol ihr kenned üs gnueg guet, dass ihr das nöd glaubed.. ;)

Für d Jessi hets e Drink geh wo sie mit de Lehrerin (Kathy) teilt het... leider weiss sie de Name vo dem Drink nüm.. aber er isch GROSS gsi.. :D und für d Nadine het e grosse Margarita geh... als erschts.. :P nocher denn no zwei grossi Long Island, wo würklich sehr fein und süffig gsi sind (ach wie het sie die vermisst...) aber an die vom Yamba chömeds definitiv nöd ane.. ;)

Wasmer natürlich au no müend erwähne.. in dem Clevelander hets e outdoor Pool gha.. da het sich d Nadine natürlich nöd entgo lo und het no ei zwei schwumm gno... ;)

Irgndswenn mitte Nomi bis spötere Nomi (sorry, da wüssed mir jetzt au nüm so genau :P), sind mir denn richtig Drexel (also hei) das heisst d Jessi und d Milena, d Nadine isch mitem Kevin no bliibe und het ihren Long-Island in aller ruhe fertig trunke.. Wo denn d Nadine au entlich hei cho isch, het sie denn zersch no e Tanz ufem Laptop anegleit, wo sie aber nümme weiss... Sie het sich am nexte Tag gfrooged werum de Lapi en riss het.. :P (aber er isch chlii, und nöd gross de Redenswert... :P)

Guet, noch dere Showihlag, hend mir üs eigentlich nur schön gmacht, zum wieder ins Clevelander go, wo mir mit paar anderne vode Schuel, wie au mit de Kathy abgmacht hend.. :)

----> Es isch e kuule Obig gsi!!

Nur het das de Nadine und de Jessi nöd glanged.. "nur so e kuule Obig".. also hend mir e Punkt uf de "to do" Liste wölle erfülle... so hend mir allne gseit, sie selled doch schomol vorgo, mir chömed denn so ca. i 30 Minute noo...

Was denked ihr, isch üs echt do dur de Kopf gschwirrt??

Genau... du hesches erfasst.. mir sind wahnsinnig stolz uf dich:

NACKT BADE IN MIAMI BEACH!!!!!!!!!!

Natürlich finded ihr e Bild vo dere Aktion, aber will mir so güetig sind, hend mir gwüssi Kleidigsstück für s Foto ahphalte.. ;) (ihr erkenneds an dem, dass eini miteme pinkige Bikini-Oberteil und schwarze Hösli im Sand liit.. wer dass da isch.. das bleibt ein Rätzel... :D)

Guet, noch üsere super Aktion, hend mir üs denn au uf de Weg hei gmacht und hend heimlich ghofft, die andere sind nöd döt.. da mir recht uf de schnurre gsi sind.. :)

Wie bstellt, isch denn au niemer dört gsi, JACKPOT!!!! Also sind d Nadine und d Jessi husch husch ine, Pischi montiert und unter d Bettdecki ghuscht.. kei 5 Minute spöter, schälled de Jessi ihre Telefon.. d Nummere hemer nöd kennt, also lömers lüüte... kei zwei Sekunde spöter klopfts an de Tür.. d Nadine macht uf und de Matteo und de Bugra stönd do und wend no eis trinke mit üs.. mir hend sie denn au höflich ine bäte, ihne e Smirnoff angstellt und mir hend im Bettli gwartet bis sie entlich leer gha hend.. :P noch gfühlte 5 Stund hend sie s denn au entlich gschafft und beschlosse sie löched üs schloofe.. THANKS GOD!!! :D

So sind d Nadine und d Jessi ins Land vode Tröimli verfalle..

Guet, denn isch au scho Ziischtig worde und mir hend gfunde hüt gönd mir doch mol ins Seaaquarium in Miami.

Viel z verzelle gits eigentlich nöd, es isch schöön gsi das alles z gseh, aber mega speziell isches eigentlich nöd gsi.. einzig d Orca Show.. die isch wahnsinnig gsi.. würklich sehr beeihdrukend, die Bindig zwüsche Orca und Trainerin..

Zobig hend mir denn no kurz beschlosse en Schwumm im Ozean z neh und noher sind mir ihglade gsi bide Vany und Gina zum Esse.. Es het Fleisch mit Bohne im Speckmantel und verspöteti Pommes geh (die hättet ind Fritöse selle, aber da isch ihne leider nöd zur Verfüegig gstande, so hends in Ofe müesse.. dementsprechend hends gschmöckt... :P)

Isch e sehr e feins z Nacht gsi!!! Nomol es riese dankeschön!!

Vollgesse sind mir denn au üsne Tröimli verfalle.. :)

DOCH DENN........

Am morge am 3:15 (IN DE NACHT!!!!!!) klopfts wie wild an üsere Tür (mir hend jo inzwüsche üses Schloofgemach, füre züglet, wege de Wanze im Schlofzimmer).. so sind mir im Bett gstande!! Durch das, dass mir kein Spion hend, hend mir denkt mir bliibed eifach ruhig und dünd nüd degliiche.. doch es het nümm welle hööre..

Z mol seit e männlichi Stimm:

" Nadine and Jessica, please open the door, it's really important!!"

Okey, die Stimm kenned mir: Es isch üsen gliebte Genfer de Sebastian...

Also hend mir denkt mir sind jo kei Unmensche und d Nadine het d Tüüre göffnet.. Er het denn verzellt, es gech ihm sehr schlächt, ihm heg öbber öbis is Getränk due, sis Herz rast wie wild, er heb e komische Kopf und brännendi Bei.. So hend mir de Emergency Nummere welle ahlüüte, er het aber gmeint es Glas Wasser und Iis hilfi ihm viellicht scho wiiter...

So isch er denn au e Stündli oder meh, bi üs uf em Sofa ghöcklet und üs schön wach ghalte... Danke nomol für das liebe Sebastian.. :)

Nei, wer weiss was hätt chönne sii und mir hend gern gholfe.. Schön isch nöd meh passiert und ihm gohts jetzt wieder guet.

So sind mir denn am Mittwuche morge, dementsprechend müed ind Schuel torklet und es isch seeehr still gsi ufem Weg..

Und welch Wunder, de Sebastian hend mir nöd ahtroffe in de Schuel.. :)

An dem Morge het d Nadine ihres Jäggli dihei vergesse und natürlich isches genau denn so huere chalt gsi im Schuelzimmer.. sogar d Kathy het gfroore.. so hend mir üs alli au nöd würklich chönne konzentriere und so isches denn zunere luschtige talkstund worde.. :)

Am Nomittag hend mir beschlosse, alles chli gmüetlich ahgo lo und die letschte Stunde eifach nochli z gnüüse...

Zobig sind mir denn chli mit anderne duss ghocket und hend eis zwei trunke..

Dunnschtig.. hmm jo mir Pflichtbewusste Schüelerinne hend gfunde mir stönd früeh uf............ ZUM ÜS ES LETSCHTS MOL S RICHTIG DURE Z BRÖÖTLE.. :D

So hend mir Sandwich, Getränk und und und i üsi neukaufti Küehlbox verfrachtet und sind mitem Taxi an South Point.. wuuuuuuunderschöne Strand und eifach wuuunderbars Wasser..

Hardcore brüüne isch ahgseit... :) Da's aber sehr heiss gsi isch hend mir doch öbbe e Abküehlig bruucht und so hend mir üs immer wieder mit de grosse Welle ahgleit.. Natürlich hend mir au IMMER gwunne.. :D

Im Wasser seit d Jessi z mol zude Nadine, hei lueg e blaui Qualle... IIIIIIIH... Also schnell weg!!! Do müend mir natürlich üsen Kolleg au infomiere wo paar Meter wiiter vo üs am kämpfe gsi isch mit de Welle.. So schreit d Nadine zu ihm: "Kevin, do hets Qualle!!!" No chert sich doch glatt eini um wo au am bädele gsi isch und meint: " WO????"

Hauptsach mir schwimmed in Miami im Ozean und mir werded verstande... :P

Noch öbbe 8 Stund hardcore sünnele und bädele hend mir üs wieder uf de Heiweg gmacht.... Dihei denn de Schock: ABARTIG BRUUUUN ROT... scho fascht schwarz.. :P

NEI, mir stelled kei Foti online mit üsne wiise Fudis.. :P

Am Obig hets wie ein Wunder: DREXEL PARTY geh.. :) bis lang ind Nacht, hend mir üs mit üsne neugwunnene Kollege und Kolleginne amüsiert und hends eifach guet gha mitenand..

Friiitig, de letscht Schueltag.. Zertifikat..

Kathy het beschlosse, dass mir nöd im Klassezimmer müend hocke und so sind mir use go Amerikaner interviewe über ihres Arbetslebe... ca. e halb Stund und nocher simer wiiter in die next Beiz.. :)

Uf die viertel vor 12fi hend mir müesse zrugg ind Schuel, das denn d Zertifikat geh het.. Zrugg im Klassezimmer, het d Kathy es Lied mit GOODBYE laufe lo.. ansscheinend e sehr e bekannts in Amerika... Aber mir hend das no nie ghört... Aber es isch seehr herzig gsi.. :)

So hend mir au no e Klassefoti gmacht (leider sind nöd alli ahwesend gsi) und denn ischs geknuddel los gange.. Isch nöd eifach gsi..

Nocher sind alli einzeln ufgrüeft worde wo e Zertifikat bechömed.. bide Jessi und Nadine hets e grosses Geschrei geh, dank de Gina und de Vany... :D

Noch de Zertifikat-Übergob sind mir mitenand go z Mittag esse und hends eifach nomol gnosse mitenand..

Am Nomi hets denn gheisse: PACKE!!!!! :(

Mir hends würklich grad welle mache.. aber irgendswie hend mir da eifach nöd gschafft.. üsi Bei hend sich nöd welle ufraffe zum Packe... so hend mir da ganze uszögered bis öbbe am 5fi.. denn hend mir müesse.. Schliesslich hend mir am 7bni mit de anderne abgmacht bi üs im Drexel zum s letscht mol Party z mache mitenand..

Jo.. s isch denn 8di worde bis mir berat gsi sind, da mir no hend müesse duusche und Alkohol poste und natürlich esse... (DANKE AND MILENA FÜRS KOCHE.. :D ISCH SEHR FEIN GSI)

Denn isches los gange.. ein nochem andere isch denn langsam ihtrudlet.. au üsen Model Kolleg het sich zu üs gsellt.. Sowie d Kathy isch au cho.. und do müend mir viellicht no erwähne.. sie het nur kurz welle bliibe.. isch denn aber schlussentlich eini vode letschte gsi wo gange isch.. :)

Jo.. irgendswie hend mir kei Schlussstrich chönne zie... so sind mir bis in die frühen Morgenstunden am fiire gsi..

D Nadine het einisch am morge am 6si gmeint sie gech ufs WC... Nur isch sie nüme zrugg cho.. also het d Jessi und d Milena denkt, sie isch sicher ufem WC ihpennt... abr nei d Nadine isch eifach die vernüfftigscht vo allne gsi und isch go schlooofe.. IM BETT!!!! :D

Schliesslich hend mir jo no 4 Stund Autofahrt noch Key West vor üs...

De Abschied vo jedem einzelne isch mega hart gsi.. me het doch scho einiges mitenand erlebt und einigi fescht is Herzli gschlosse in dere kurze ziit..

D Jessi und d Milena hend in dere Nacht kei Schlof becho.. d Nadine immerhin 2 Stund.. :)

Am 11 am Morge hend mir denn s Apartement müesse abgeh.... :( es isch würklich kei eifache Schritt gsi.. Au hend mir jo am Obig vorher nochli d Kleider usgmischtet und hend denn entschlosse mir schenked die de Putzfrau... Sie het sicher meh devo, wie de Abfall-Kübel!! :) So lieb geled?? :D :P

Ah jo, fascht vergesse.. wärend dem mir üsi letschte Sache packt hend am morge, het d Milena de Jessi no e Brot welle toschte... z mol stinkts würklich gruuuuuusig... mir laufed füre und gsend dass de huere Toschter brennt!!!!!!!! Aber de Füürmälder isch glaub wie au d Kameras nur e atrappe.. isch nämmli nöd ab...

Jetzt isch doch de liebe Milena e Zündholz-Schächteli in Toschter in gheit und sie het da nöd gmerkt.... War auch ein tolles erlebniss.. :P Zum Glück müend mir de nüm benutze..... :P E Guete am nächste.. :D :P

So hend d Jessi und d Nadine sich uf de Weg gmacht zum s Auto go hole... jojo, de Mage isch recht flau gsi... naja... selberschuld.. :D

De lieb Herr vode Autovermietig het üs zeiged wa füre Auto mir bueched hend... begeisterig het sich in Grenze ghalte... er het denn aber gmeint er geb üs e grössere bessere, da d Jessi erwähnt het, dasmer mol ni kurz 4 Lüüt sind und mir jede Menge Gepäck hend.. :)

Noch öbbe 30 Minute warte, hend mir üses Auto chönne entgegeneh.. RIESE BEGEISTERIG!!! E huere geils Auto.... Es isch e ER!!!! Dörfed mir vorstelle:

BRAD!!!!! :D

De Brad begleitet üs jetzt mitem Werner (üses Navi) die nöchschte 3 Monet.. ;)

De Brad het sich denn au grad chönne unter Bewiis stelle ufem Weg noch Key West...

Eigentlich isch alles super und schöön gsi mit ihm.. doch er het immer pfiiffe!!! z ersch hemmer denkt er pfifft viellicht de schöne Fraue noh, abr wo denn mol e dicke unpflegte Maa am Strosserand gstande isch und er het pfiffe, hend mir denn scho denkt do stimmt doch öbbis nöd.. ;) So het d Jessi sich uf d Suechi nochem Fehler gmacht und het eifach mol chli am Brad umegschruubed..

Sie het glaub alles abgstellt aber nöd s Pfiiiffe.. ABER DANKE FÜR DE IHSATZ LIEBI JESSI.. :D

Guet, mit viel gepfiife sind mir denn guet in Key West ahcho.. d Jessi und d Milena hend gfunde sie hebed no hunger und gönd no neume öbbis go esse.. d Nadine het sich abgmold und gmeint sie müess schloofe...

Also sind die beide lostrottet und hend denn irgendswenn au es Restaurant gfunde wo sie ganz romantisch anen zweier Tisch am Fenschter gsetzt worde sind.. :)

Wo sie hei cho sind, het d Nadine au scho gschloofe.. :)

Am nächste Tag hend mir chli Key West unsicher gmacht, es isch würklich ganz herzig und herzlich.. me mueses gseh ha.. aber sehr speziell isches würklich nöd..

Dementsprechend sind mir mitte Nomittag denn au wieder richtig Miami düüst.. Damol isch d Jessi gfahre.. :)

Und wie scho ufem Hiweg het d Milena hinde inne kröösed.. :)

In Miami ahcho hend mir dörfe e Nacht bide Milena und ihrere Hostfamily übernachte.. Ganz herzlichi Lüüt.. :)

Da mir aber gfunde hend, mir chönd die letscht Nacht in Miami nöd eifach mit is Bett ligge und schloofe abschlüüse, hend mir beschlosse mir höcklet nochli an Beach... isch würklich huere schön gsi!!!

Irgendswenn kurz vor Mitternacht hend mir denn gfunde mir verlönd de Beach gschieder, sus möched mir no Bekanntschaft mit de Polizei.. (de Beach isch normalerwies abem 12fi gschlosse)..

So sind mir hei und hend üs ihkuschelet.. ES ISCH ARSCHKALT GSI DIE GANZ NACHT!!!! Ein Dank an die tolle Klimaanlage.. mir händ üs gwünscht sie gecht entlich kapput!!! War wohl leider nix...

Naja, jetzt wüssed mir, wie fescht so e Klimaalag chan chüele.. ;)

Am Morge hend mir denn d Milena no ind Schuel gfahre und beschlosse nomol schnell im Klassezimmer verbii z luege.. mir hend denn allne nomol chönne tschüss sege und d Kathy au nomol fescht drücke..

d Milena het üs nöd im Klassezimmer welle tschüss sege.. so sind mir chli weg gloffe und denn sind d Träne gflosse.... :(

Ooooh.. mir vermissed eu alli würklich brutal!!! Danke nomol für die genial Ziit mit eu!!!

Tag 43, Everglades/Kissimmee - 22.04.2013

Nochdem mir üs denn vo üsne Schuelgspändli trennt hend, sind mir den no es paar Souvenirs go pöschtele..:) Schnell sind mir au fündig worde und ufem Weg zrugg zum Brad het üs den de feini Duft vonere Bäckerei überwältigt und mir sind üs no go feini Brötli hole... Gstärkt sind mir den zrugg bim Auto ahcho und hend am Werner d Adresse vo de Everglades ahgeh und den isch es den entlich los gange...

1 1/2 Stund spöter sind mir den dere Sach scho nöcher cho, aber vor üs hemer ufeimol so e langsams Auto gha, wo den au aprupt rechts use gfahre isch ohni blinke..... Guet üs sölls recht sii, so chömed mir wenigstens vorwärts, aber chum simer ah dem Pickup verbi gfahre gönd au scho d Polizeiliechter ah... UUUPPPPSSSS....:P Okey also rechts use fahre und abwarte... De Herr Polizist het sich den au zimlich lang Ziit loh, bis er den entlich mol usgstiege isch und verwunderlicherwiis uf de Bifahrersiite as Fenster klopfet het... Also het d Nadine den schö brav uf ihrere Siite s Fenster abeloh... Er het gar nöd nett usgseh und üs den gfroged, ob mir wüssed, wieso er üs ahghaltet het??? Ganz unschuldig hend d Nadine und d Jessi ihn ahglueget und gmeint: No...

Sinere Meinig noh simer z schnell und z nöch ufgfahre, aber glücklicherwiis hend mir nur e Verwarnig kassiert... :) (Uf em Foto gsehnd ihr den aber, dass de Abstand sicherlich gnueg gross gsi isch....)

Guet, also wiiter gohts, schliesslich hemer no sicher 2 Stund Fahrt vor üs.... hemer gmeint... Bis den de Werner irgendwo im nirgendwo s Gfühl gha het mer müessed links abbüge... Leider hets det aber kei Stross gha... Zur Sicherheit hemer den aber umkehrt zum üs vergwüssere, dass mer sicher nix überseh hend, aber es isch au bim zweite mol kei Stross weg gange...:) Demfall wieder kehre und eifach mol grad us... Irgendwenn het d Nadine den gmeint, dass öpis nöd chan stimme, well es het kei Sümpf und au kei Auto wiit und breit gha - alles was mir gseh hend isch Pampa... :P Also den kehret mir doch wieder und hend am Werner e anderi Everglades-Adresse ihgeh... Ufeimol fahred mir in extreme Rägä ine und sind sofort is Aquaplaning cho... :S Zum Glück isch aber alles guet gange... :) Irgendwenn sind mir den au wieder ah dem Punkt ahcho, wo üs de lieb Polizist usegnoh het und paar Meter wiiter hemer den s Visitor Center entdekt, wo mir eigentlich scho ufem aneweg hetted müesse use... (Wered mir det au use, het üs de nett Polizist au nöd usegnoh, aber naja....:))

Juuuhuuu entlich es WC... :) Und den ab go Infos hole, wo mir den jetzt eigentlich gnau ane müend.. Die Dame am Tresse het üs den mitteilt, dass mir ca. 1 Stund müend fahre bis mir det anechömed wo die Airboot-Toure statt findet und das es uf dem Weg au immer wieder Stelle het wo mer chan usefahre und z Fuess en chline Teil chan durch d Everglades spaziere... Phuuu, super es rägnät und am nöggst Tag müend mir bis Atlanta fahre, so hend d Nadine und d Jessi beschlosse, dass Projekt Everglades abzhöckle und das den mol mit üsne Jungs in ahgriff zneh... :)

Denn hend mir üs uf de 3 1/2 stündig Weg noch Kissimmee gmacht.... Entlich ahcho hemer den üses vorher usgsuechte Hotel ahgstüret und hend ihcheckt... Wo mir bi üsem Zimmer ahcho sind hemer gmerkt, dass uuuuh viel so Mexikaner ume sind und mir au dementsprechend Ufmerksamkeit erregt hend... :S Schnell is Zimmer, aber das isch alles andere wie gmüetlich gsi... :P Es het richtig gfüechtelet und schnell hemer au Schimmel gfunde hinderem Tresor... Die hend wohl en Wasserschade gha ih dem Zimmer...

Mir hend üs denn entschiede dasmer für die Nacht trotzdem bliibed, will mir doch recht uf de Schnurre gsi sind..

Tag 44 bis 46, Senoia/Union-City/Atlanta 23. - 25.04.2013

Am 7ni isch den au wieder ufstoh ahgseit gsi und das mol sind mir au ganz gschwind parat gsi, do mir nöd no länger hend welle ih dem Hotel blibe... Gschwind go uschecke und ab uf Union City... D Ziit isch ume wie im Flug und d Überraschig vo de Nadine für ihres Mami isch immer nöcher cho.. :) Churz vorem Ziel het üs den de Marci (de Fründ vo de Nadine ihrem Mami) informiert, dass mir üs ime herzige Städli namens Senoia chönd treffe.. Guet, schnell de Werner umprogrammiert und schnell richtig Senoia, well d Sonja  (s Mami vo de Nadine) scho langsam chli ungeduldig worde isch, will de Marci di ganz Ziit am Telefon gsi isch und sie nöd gwüsst het, wa sie so lang det mached...

Noch eis bis zweimol kehre hend mir den das besagte Beizli gfunde und schnell versteckt parkiert, do d Sonja gad ih üsi richtig glueget het... D Jessi het Kamera startklar gmacht und den ischs los gange... D Nadine isch langsam vorus gloffe und chum sind mir um de Ecke cho het d Sonja d Nadine gseh und het eifach numme gschraue vor Freud... :) Schliesslich isch das nöd alltäglich, dass mer sini geliebt Tochter eifach mol so ime chline Städli irgendwo ih de USA trifft...

D ÜBERRASCHIG ISCH EIFACH ZU 1000000% GLUNGE!!

Danke an Marci für sini super Unterstützig und Koordination...:D

So hend mir den alli 4 no d Sunne gnosse und eis trunke... Zum Motel het d Nadine den d Sonja im Brad chauffiert und d Jessi het dörfe mit em Marci und em Lieferigswägeli (Penske) fahre...:) Im Motel ahcho hets e churzi Lagebesprechig geh und mir hend beschlosse, dass mir 2 Nächt mitenand ih dem Motel blibed... Zum z Nacht sind mir den ines American Buffet gange... Eimol zahle und den esse bis zum umgheie, dass hend den de Marci und d Jessi wörtlich gno... ;) Danke nomol de Sonja und am Marci für d Ihladig.. De Obig hend mir den vor üsne Motelzimmer no usklinge loh und den au bekanntschaft mit de süesse Huusbüsis gmacht...:) Bim Gspröch zwüsched em Marci und de Nadine isch den usecho, dass ih dem Städli Senoia de Nadine ihri absolut lieblings Serie dreiht wird:

THE WALKING DEAD!!!!!

Jetzt isch üs au klar, wieso üs die Stross so bekannt vor cho isch, aber dur die ganz Ufregig und do d Sonja total im Vordergrund gstande isch, hend mir gar nöd wiiter drüber noch denkt...

Nochdem isch den au schnell klar gsi: Nadine muess zruck uf Senoia...:D

Bevor mir is Bett sind het d Nadine d Sonja no müesse chlübe zum bewiise, dass es kein Traum isch und d Nadine würkli do stoht.. Das loht sich d Nadine nöd zwei mol sege und lost brav ufs Mami und so het sie den au müesse schreie, well chlübe isch jo nöd unbedingt ahgnehm... ;)

Am nöggste Morge hets den au gli ah de Wand klopfet und d Nadine het ihres no müede Chöpfli glupft und gmeint, gell das isch min GueteMorgeZiggiWecker vom Marci und schwups isch sie us de Federe ghüpft... :) Bald sind den d Sonja und d Jessi au no cho und d Sonja het den festgstellt, dass mir immer no do sind und das es definitiv kein Traum isch... :) So sind mir den gmüetlich go z mörgele und hend üs nocher frisch gstärkt uf de Weg noch Atlanta gmacht...

In Atlanta ahcho sind mir zerst is Coca Cola Museum, was aber nöd soooo mega überwältigend gsi isch, also hend mir beschlosse, mer gönd mol richtig Downtown zum go z Mittag esse.. Je tüfer mir uf Downtown ine gfahre sind um so dünkler sind au alli Lüüt uf de Stross worde, zum Glück sind mir nöd elai underwegs gsi.... :) Wo mir den es Parkhuus gfunde hend, het üs bim inefahre de Parkwächter gfroged, ob mir hilf bruched und de Marci het den gmeint No, doch mer hend den müesse feststelle, dass es chli dürftig beschriftet isch so isch d Nadine usgstiege zum de Parkwächter um Hilf z fröge... De het den aber nöd so freud gha, well jo de Marci gemint het, mer brüched kei Hilf... Aber d Nadine het das super gmeisteret und üs nocher den mitteilt wo das es dure goht...:)

Noch dem mir de Brad den parkiert gha hend sind mer den mol los gwatschlet... Ufem weg sind mir den au immer wieder ahgsproche worde, ob mir Zwilling sind... :D Klar doch... :P Mir sind den in Subway go z Mittag esse und hend üs nocher im Starbucks en feine Kaffi gönt und hend chli pläuderlet... Es isch den immer dünkler worde und drum hemer den au beschlosse, dass mir besser wieder richtig Auto gönd... Mir sind den no churz in Rägä cho aber nöd sehr fescht nass worde... :) Ufem haiweg hend mir den beschlosse, dass mir no in en Walmart gönd, schliesslich het d Sonja verzehlt, dass mer det so günstig chan shoppe und so isch es den au gsi - DANKE SONJA!!!! :D

D Nadine und d Jessi hend sich au no je en Road Atlas zue tue, schliesslich hend mir jo no einigi Destinatione vor üs und uf de Werner isch au nöd immer zu 100% verlass...:) Vor üsne Motelzimmer hend üs d Sonja und de Marci no über diversi sehenswerti Ort informiert und mir hend üsen letzte gmeinsame Obig gmüetlich usklinge loh...

De GueteMorgeZiggiWecker het sini Arbet wieder zur vollste Zufriedeheit erfüllt und paar Minute spöter sind mir den wieder richtig z Morge-Buffet glofe.. Noch es paar Kaffi isch es den au scho wieder as packe gange und vorem uschecke hend mir den beschlosse, dass mer üs doch in Senoia nomol churz treffed und üs den döt au verabschieded... Noch enere churze Autofahrt sind d Jessi und d Nadine den au wieder im historische Senoia ahcho und hend ih dem Beizli, wo d Nadine d Sonja überrascht het, en chline Mittags-Snack gönt.. Bald sind den de Marci und d Sonja au wieder zu üs gstosse und mir hend nochere churze Information vo de Servierdame den Senoia chli nöcher erkundet... D Nadine isch völlig usem Hüüsli gsi, dass isch doch eifach au es Erlebnis, wo mer nöd jede Tag erlebt... :)

De Abschied isch den aber leider immer nöcher cho und so hend mir üs den noch eme letzte Gruppeföteli langsam verabschiedet... Isch eifach e super geniali Ziit gsi und mir hend die alli sehr gnosse... Danke nomol für die geniale 3 Täg... :)

So sind d Jessi und d Nadine mit em Brad los richtig Birmingham...

Tag 104 bis 111, 23. - 30.06.2013

Bis am 26.06.2013 also Tag 104 bis 105 hend mir eigentlich gar nöd so viel gmacht, mir hend chli gwäsche und sind eifach chli gsi nit Vorfreud uf Las Vegas.

Am TAG 106 hets denn gheisse:

VEGAS BABY!!!!

Mit grosse Erwartige sind mir denn richtig Vegas düüset, s het sehr e schöni Landschaft gha und au isch s Termometer immer meh ahgstiege.. Wenn me d Hand zum Fenschter useghebed het hets ein fascht umghaue.. Und das mit Fahrtwind.. ;)

Mir hend üs aber uf die Wärmi gfreut, da mir jo au chli hend welle sünnele und so wiiter und so fort.. :)

In Las Vegas ahcho, hend mir selbstverständlich jo müesse usem Auto stiege, s erschte Bei usem Auto hend mir denkt: Nei, isch glaub besser wenn mir im kliatisierte Auto hocke bliibed.. :P

Jedoch het üs d Neugier ufs Circus Circus (üsi Unterkunft bis am 01.07.2013) packt, und mir hend gfunde mir stieged us.. :) Siehe da mir hends gschafft.. :)

S Zimmer bezoge, isch würklich wunderbar, hend mir üs beschlosse en Tattoowierer uzsueche, da d Nadine gern ihres am Bei möcht ufpimpe loh... Da mir de Tip vom Marci für es Studio nöchi alt Las Vegas becho hend, hend mir beschlosse mir möched üs uf d Suechi.. De Name isch üs bis Dato unbekannt gsi..

So hend mir de lieb Herr bim Ihgang gfoged wo mir müesed durelaufe zum det ane cho... De het denn nöd schlecht glueged wo mir gseit hend mir weled das Laufe..

Mit voller Ernergie und emne Wasserfläschli im Gepäck sind mir los gwatschlet.. Mir hend denn schnell gmerkt dases doch seeeeeeehr heiss isch unds chum schatteplätz gha het.. Scho e rechts Stückli gloffe, hend mir denn d Nochricht becho, wie de Tattoowierer heisst.. Im Handy-Navi ihgeh, hend mir denn schnell gmerkt, dass mir in die völlig falsch Richtig laufed... JUHUUUUUUU alles zrugg...

Guet, so sportlich wie mir sind, hend mir üs immer no nöd für s Auto entschlosse, obwohl mir praktisch dra verbii gloffe sind.. Nochere gfühlte Ewigkeit hend mir denn das Studio gfunde und hend au grad en Termin für am spötere Nomittag becho.

Da mir doch recht gschaffe gsi sind vode Hitz und d Jessi fasch kolabiert isch, het d Nadine es Taxi welle ahhalte.. aber irgendswie het üs kei welle mitneh.. Jänu.. Do chame nüd mache.. Also zrugg laufe..

Endlich im Hotel ahcho, sind mir denn zersch mol is Zimmer, Klimaalag ah, und tonnewies Wasser trunke..

Da me jo bekanntllich us Fehler lernt, hend mir beschlosse damol s Auto zneh.. Und mir chönd eu sege, da isch viiiiiel ahgnehmer gsi.. ;)

Guet, de lieb Tattoowierer het denn au schnell öbbis zeichnet gha, wo uf Anhieb passt und los ischs gange.. 1 1/2 Stund spöter isches gschafft gsi.. d Nadine au.. :)

Für am Obig hend mir denkt, mir gönd i üsem Hotel (da isch sehr gross, und het eigeni Casinos) go Casinobars abchecke..

Bide zweite ahcho sind mir denn au hange blibe.. Ja mir hend hinter de Bar s Double vom Vin Diesel kenne glernt... De hets au sehr guet gmeint mitem Alkohol usschenke.. Und jo mir verträgets jo no so guet.. :P

Am spötere obig hend mir üs müesse zuegestoh, dases gnueg isch und mir gschieder gönd go haia mache..

Am nexte Morge, sind mir denn nöd vonelei verwachet.. Nei mir hend nochbuure becho mit schreiende Kind.. Jeeeeeeeeh...

Dementsprechend gluunet hend mir denn au de Tag gstartet..

Guet, natürlich hend mir welle go Vegas abchecke.. So wend mir doch usem Hotel laufe.. Do schlohts üs doch vor Hitz grad wieder zrugg.. Unglaublich wie heiss dases do isch.. Ihr hends jo in de Medie sicher au scho mitbech... Da chamer sich würklich nöd vorstelle.. So troche so uuuuuh.. eifach heiss.. Schnuufe isch do im Moment de gröscht Sport.. :)

So hend mir beschlosse eifach chl s Hotel abchecke schliesslich isches jo gnueg gross.. :)

Jo, jetzt simer doch scho paar Täg do und mir findes würklich de hammer, absgeh vode Hitz..

Jetzt freued mir üs unendlich uf üsi Jungs morn und sind richig nervös.. Natürlich sind mir no en Schlumi go neh im Casino.. Jedoch het de nöd viel brocht.. Jänu irgendswie schaffed mir da scho dasmer chönd schloofe.. :)

Die nexte zwei Wuche werded ihr wohl eher weniger vo üs ghöre.. Föteli werded au ersch denn ufe glade.. :)

Aber mir denked ihr bringed vollschtes Verständniss für da.. :) DANKE... :D

Mir wünsched eu jetzt schöni zwei Wuche und schicked gaaaaaanz viel Wärmi zu eu id Schwiiz.. Schliesslich hend mir jo gnueg devo.. :)

Bis bald

peeeeeeeeeeease

J&N

p.s

Mir hend s Zimmer gwächslet.. isch doch chli viel Geschreie gsi vo dene Kinde.. aber so viel Glück mir hend, sind geschter wieder neu Nochbuure cho ebefalls mit schreiende Kind.. :D

Aber morn Morge sind mir mol die luuuuuute.. *ääätsch* :P